TAARIFA KWA VYOMBO VYA HABARI
RAIS wa
Shirikisho la Mpira wa Miguu nchini (TFF), Bw. Leodgar Tenga amesema Tanzania
itatumia mashindano ya soka kwa wanawake na vijana kama sehemu mojawapo ya
kueneza kampeni dhidi ya ugonjwa wa Malaria.
Ametoa
kauli hiyo juzi usiku (Jumamosi, Februari 9, 2013) wakati alipokuwa akichangia mjadala
kuhusu juhudi za sekta binafsi katika kupambana na ugonjwa wa malaria
uliofanyika kwenye Kituo cha Mikutano cha Kimataifa cha Sandton, kilichopo
jijini Johannesburg, Afrika Kusini. Mjadala huo uliambatana na hafla ya
chakula cha jioni.
Alisema Tanzania imedhamiria kuwa mbia katika
kampeni ya kupambana na malaria, kwani inajua umuhimu wa kuwa na makocha na
wachezaji wenye afya njema.
“Kampeni hii ni nzuri, tena ya muhimu sababu
inalenga kuelimisha jamii juu ya kujikinga na ugonjwa wa Malaria. Ili ufanikiwe
katika michezo, ni lazima uwe na wachezaji na makocha wenye afya, ambao si
wagonjwa,” alisisitiza.
Naye Mark Fish ambaye zamani aliichezea timu ya
soka ya Bafana Bafana ya Afrika Kusini, alisema anatambua adha ya ugonjwa,
sababu wakati akicheza soka Zimbabwe aliwahi kuugua Malaria.
“Nina matumaini makubwa ya kushiriki kampeni hii
ya kupambana na ugonjwa wa Malaria, alisema Bw. Fish wakati akihojiwa na Bi.
Carol Tshabalala, mtangazaji wa kituo cha televisheni cha SuperSport.
Naye Mtendaji
Mkuu wa Benki ya Standard Chartered ya Afrika Kusini, Bw. Sim Tshabalala
alisema karne hii itakuwa ni karne ya kushangaza kwani wamedhamiria kupambana
na ugonjwa huu kwa namna yoyote ile.
Alisema Benki hiyo imeungana na wenzao wa Tanzania
katika Programu ya “Malaria Haikubali”. Benki hiyo imeajiri wafanyakazi zaidi
ya 25,000 nchini Afrika Kusini.
Akizungumzia kuhusu juhudi za Benki hiyo katika
kampeini dhidi ya Malaria, Bw. Tshabalala ambaye alihojiwa na Bi. Carol
Tshabalala wa SuperSport katika raundi ya pili ya mjadala mchango wa
sekta binafsi kwenye vita dhidi ya malaria, alisema mwaka 2009-2010 Benki hiyo
ilitumia dola za Marekani milioni 600 kwa ajili ya matibabu ya wafanyakazi
waliougua malaria.
“Tumeeamua kudhamini kampeni hii kwa kugawa
vyandarua 11,000 kwa wafanyakazi wetu na vyandarua vingine 50,000 tumevigawa
kwa wanajamii. Pia tumetoa elimu kwa watumishi, familia zao na wananchi ili
kukuza uelewa wao kuhusu ugonjwa huu,” alisema.
Naye Mjumbe wa Taasisi ya Global
Fund, Bw. Brian Brink alisema zinahitajika zaidi ya dola za Marekani bilioni
tatu kutoka kwa wafadhili mbalimbali ili kuendeleza kampeni dhidi ugonjwa wa
Malaria.
Alisema
gharama za Mpango huo kwa bara la Afrika peke yake zimefikia dola za Marekani
bilioni 12 kwa mwaka, lakini anafarijika anapoona njia mbadala za kukabili
ugonjwa huo zinatumiwa.
“Tanzania
ni mfano wa kuigwa katika kampeni, hasa kwa vile imeweka jitihada za kutumia
mbadala kama vile upuliziaji wa dawa ukoko (Residual Spraying) na
kutengeneza dawa za mseto za gharama nafuu. “Dozi ya ALU haizidi Dola 10 za
Marekani, kwa kweli wao ni mfano wa kuigwa,” alisema huku akishangiliwa na
idadi kubwa ya wageni walioshiriki kusikiliza mjadala huo.
(mwisho)
IMETOLEWA
NA:
OFISI YA
WAZIRI MKUU,
DODOMA.
JUMATATU,
FEBRUARI 11, 2013.
This post was written by: Author Name
Your description comes here!
Get Free Email Updates to your Inbox!
Post a Comment